மதுரைக்காஞ்சி – மாங்குடி மருதனார்

மதுரைக்காஞ்சி

• பத்துபாட்டு நூல்களுள் ஒன்று மதுரைக்காஞ்சி
• காஞ்சி என்றால் நிலையாமை என்பது பொருள்.
• மதுரையின் சிறப்புகளைப் பாடுவதாலும் நிலையாமையைப் பற்றிக் கூறுவதாலும் மதுரைக்காஞ்சி எனப்பட்டது.
• மதுரைக்காஞ்சியைப் ‘பெருகுவள மதுரைக்காஞ்சி’ என சிறப்பித்துக் கூறுவர்.
• மதுரைக்காஞ்சி 782 அடிகளைக் கொண்டது. அவற்றுள் 354 அடிகள் மதுரையைப் பற்றி மட்டும் சிறப்பித்துக் கூறுகின்றன.
• மதுரைக்காஞ்சியின் பாட்டுடைத் தலைவன் தலையாங்கானத்துச் செருவென்ற பாண்டியன் நெடுஞ்செழியன்.

மாங்குடி மருதனார்

• மதுரைக்காஞ்சியைப் பாடியவர் மாங்குடி மருதனார்.
• மாங்குடி மருதனார் திருநெல்வேலி மாவட்டத்தில் உள்ள மாங்குடி என்னும் ஊரில் பிறந்தவர்.
• மாங்குடி மருதனார் எட்டுத்தொகையில் பதின்மூன்று (13) பாடல்களைப் பாடியுள்ளார்.

மதுரை நகர்

• மதுரையைச் சிறப்பித்துப் பாடியுள்ள பதினெண் மேற்கணக்கு நூல்களுள், முதன்மையானது மதுரைக்காஞ்சி
• மதுரை மாநகர் மக்களின் வாழ்விடம். கோட்டை கொத்தளம், மதுரை நகரில் நிகழும் திருவிழாக்கள், பலவகைப் பள்ளிகள், நாற்பெருங்குழு, அந்தி வணிகம் ஆகிய காட்சிகள் மதுரைக்காஞ்சி நூலில் கவித்துவமாய் விரிந்துள்ளன.
• காலை தொடங்கி மறுநாள் விடியல் வரையில் நகரத்தைச் சுற்றிவந்து கண்ணுற்றதை முறைப்படுத்திக் கூறுவது போன்ற வருணனைப் பாடல் அமைந்த நூல் மதுரைக்காஞ்சி.
• தமிழ்தாயின் ஆணிவேர் துளிர்த்த இடம் மதுரை.
• 2 ஆயிரம் ஆண்டுகளுக்கும் மேற்பட்ட வரலாற்றைக் கொண்ட உலகின் தொன்மை நகரங்களில் ஒன்று மதுரை.
• மதுரை நகரத்தில் இயலும் இசையும் நாடகமும் பொங்கிப் பெருகின.

மதுரையில் வனவிலங்குச் சரணாலையம்

• “பொறிமயிர் வாரணம் டுறை வயமாப் புலியொடு குழும” – மதுலரக்காஞ்சி (673-677 அடிகள்)
• மதுரையில் வனவிலங்குச் சரணாலையம் இருந்த செய்தியை மதுரைக் காஞ்சியின் பாடல் மூலம் அறியலாம் என பத்துபாட்டு ஆராய்ச்சி நூலில் மா. இராசமாணிக்கனார் குறிப்பிட்டுள்ளார்.

மதுரைக்காஞ்சி பாடலின் சுருக்கம்

• மண்வரை ஆழ்ந்த தெளிந்த அகழி, விண்ணை முட்டும் கற்படை மதில்கள்.
• தொன்மை உடைய வலிமை மிக்க தெய்வத் தன்மை பொருந்திய நெடுவாசல்
• பூசிய நெய்யால் கறுத்த கதவுகள், முகில்கள் உலவும் மலையொத்த மாடம்,
• வற்றாத வையை போல் மக்கள் செல்லும் வாயில்.
• மாடம் கூடம் மண்டபம் எனப் பல வகை பெற எழுந்து வானம் மூழ்கி தென்றல் வீசும் சாளர இல்லம்.
• ஆற்றைப் போன்ற அகல்நெடும் தெருவில் பலமொழி பேசுவோர் எழுப்பும் பேச்சொலி.
• பெருங்காற்று புகுந்த கடலொலி போல விழாவின் நிகழ்வுகள் அறையும் முரசு,
• நீர் குடைந்தது போல் கருவிகளின் இன்னிசை, கேட்டோர் ஆடும் ஆரவார ஓசை.
• ஓவியம் போன்ற இரு பெரும் கடைத் தெருக்கள்.

பெருகுவள மதுரைக்காஞ்சி

பாடல்-351-365

• மதுரை மாநகர் மண்உற ஆழ்ந்த மணிநீர்க் கிடங்கின் விண்உற ஓங்கிய பல்படைப் புரிசை * *
• தொல்வலி நிலைஇய, அணங்குடை நெடுநிலை நெய்படக் கரிந்த திண்போர்க் கதவின் **
• மழை ஆடும் மலையின் நிவந்த மாடமொடு வையை அன்ன வழக்குடை வாயில் *
• வகை பெற எழுந்து வானம் மூழ்கி சில் காற்று இசைக்கும் பல் புழை நல் இல் * *
• ஆறு கிடந்தன்ன அகல் நெடுந் தெருவில் பல்வேறு குழாஅத்து இசை எழுந்து ஒலிப்ப
• மாகால் எடுத்த முந்நீர் போல முழங்கிசை
• நன்பணை அறைவனர் நுவல, கயம் குடைந்தன்ன இயம் தொட்டு இமிழிசை
• மகிழ்ந்தோர் ஆடும் கலிகொள் சும்மை ஓவுக் கண்டன்ன இரு பெரு நியமத்து**

                                           –மாங்குடி மருதனார்

பாடலின் பொருள்

• மதுரை மாநகரில் ஆழமான தெளிந்த நீரையுடைய அகழி உள்ளது. பல கற்களைக் கொண்டு கட்டப்பட்ட மதில் வானளவு உயர்ந்துள்ளது
• பழைமையானதும் வலிமை மிக்கதும் தெய்வத்தன்மை பொருந்தியதுமாகிய வாயில் உள்ளது.
• அவ்வாயில் நெய் பூசியதால் கருமையடைந்த வலிமையான கதவுகளை உடையது.
• மேகங்கள் உலாவும் மலை போல் மாளிகைகள் உயர்ந்து உள்ளன.
• இடைவிடாது ஓடுகின்ற வையை ஆற்றைப் போல மக்கள் எப்போதும் வாயில்கள் வழிச் செல்கின்றனர்.
• மண்டபம், கூடம், அடுக்களை எனப் பல்வேறு பிரிவுகளைக்கொண்டு வான் வரை ஓங்கிய தென்றல் காற்று இசைக்கும் பல சாளரங்களையுடைய நல்ல
• இல்லங்கள் உள்ளன.
• ஆறு போன்ற அகலமான நீண்ட தெருக்களில் பொருள்களை வாங்க வந்த மக்கள் பேசும் பல்வேறு மொழிகள் ஒலிக்கின்றன.
• விழா பற்றிய முரசறைவோரின் முழக்கம் பெருங்காற்று புகுந்த கடலொலி போல் ஒலிக்கிறது
• இசைக்கருவிகளை இயக்குவதால் உண்டாகும் இசை, நீர்நிலைகளைக் கையால் குடைந்து விளையாடும் தன்மைபோல எழுகிறது.
• அதனைக் கேட்ட மக்கள் தெருக்களில் ஆரவாரத்தோடு ஆடுகின்றனர்.
• பெரிய தெருக்களில் இருக்கும் நாளங்காடியும் அல்லங்காடியும் ஓவியங்கள் போலக் காட்சியளிக்கின்றன.

 சொல்லும் பொருளும்

• புரிசை – மதில்
• சில்காற்று – தென்றல்
• மாகால் – பெருங்காற்று
• பணை – முரசு
• ஓவு – ஓவியம்
• அணங்கு – தெய்வம்
• புழை – சாளரம்
• முந்நீர் – கடல்
• கயம் – நீர் நிலை
• நியமம் – அங்காடி